பொதுவாக 10 , 15 வருடங்களுக்கு முன்னர் ஷங்கர் எடுத்த திரைப்படங்களை, ஏனைய இயக்குனர்கள் பாராட்டி வந்தார்கள். ஆனால் தற்போது வேறு இயக்குனர்கள் எடுக்கும் படங்களை ஷங்கர் பாராட்டி வருகிறார். அடுத்து அடுத்து பல தோல்விப் படங்களை இயக்கி, லைக்கா நிறுவனத்தை மண் கவ்வ வைத்தது மட்டுமல்லாது, பல தொழில் அதிபர்களை அட்ரஸே இல்லாமல் செய்தவர் இயக்குனர் ஷங்கர்.
இவர் ட்ராகன் படம் பற்றி என்ன சொல்லி இருக்கிறார் ?
பிரதீப் ரங்கநாதன் நடிப்பில் சமீபத்தில் வெளியான “டிராகன்” திரைப்படத்திற்கு பார்வையாளர்களிடமிருந்து நல்ல வரவேற்பு கிடைத்துள்ளது. அஸ்வத் மாரிமுத்து இயக்கி, ஏஜிஎஸ் என்டர்டெயின்மென்ட் தயாரித்துள்ள இந்த திரைப்படம் பல்வேறு திரைப்பட தயாரிப்பாளர்கள் மற்றும் நடிகர்களிடமிருந்து பாராட்டைப் பெற்றுள்ளது.
சமூக ஊடகங்களில் தனது எண்ணங்களைப் பகிர்ந்து கொண்ட இயக்குனர் ஷங்கர், “‘டிராகன்’ ஒரு அழகான திரைப்படம். சிறந்த எழுத்துக்காக இயக்குனர் அஸ்வத் மாரிமுத்துவுக்கு வாழ்த்துகள். படத்தில் உள்ள ஒவ்வொரு கதாபாத்திரமும் அழகான மற்றும் முழுமையான பயணத்தைக் கொண்டுள்ளது. பிரதீப் ரங்கநாதன் மீண்டும் ஒரு முறை சிறந்த பொழுதுபோக்கு மற்றும் வலிமையான, உணர்வுப்பூர்வமான நடிகர் என்பதை நிரூபித்துள்ளார்” என்று எழுதினார்.
மைஸ்கின், அனுபமா பரமேஸ்வரன் மற்றும் ஜார்ஜ் மரியன் ஆகியோரின் நடிப்பையும் ஷங்கர் பாராட்டியுள்ளார், அவர்களின் நடிப்பு நீடித்த தாக்கத்தை ஏற்படுத்தியதாகக் கூறினார். ஜென்-இசட் மற்றும் மில்லினியல் கதாபாத்திரங்கள் எவ்வளவு நன்றாக சித்தரிக்கப்பட்டன என்பதை அவர் எடுத்துரைத்தார்.
படத்தின் கடைசி 20 நிமிடங்களைப் பற்றி குறிப்பிடுகையில், அது உணர்ச்சிகரமாக நகர்ந்தது என்றும், இன்றைய ஏமாற்று உலகில் படத்தின் இன்றியமையாத செய்தியைப் பாராட்டுவதாகவும் கூறினார்.
